Mavzu: “Ta’lim korrupsiyadan holi hudud”ga aylanadi
Ma’ruzachi: Farg‘ona viloyati Maktabgacha va maktab ta’limi boshqarmasi boshlig‘i o‘rinbosari
Dilafruz Qosimova
________________________________________
Hurmatli hamkasblar, aziz ota-onalar va brifing ishtirokchilari!
Bugungi brifingimiz mamlakatimizda korrupsiyaga qarshi kurashish borasida olib borilayotgan izchil islohotlar, xususan maktabgacha va maktab ta’limi tizimidagi profilaktik chora-tadbirlar, raqamlashtirish jarayonlari hamda “Korrupsiyasiz soha” loyihasining amalga oshirilishi haqida axborot berishga bag‘ishlanadi.
Davlat siyosatining ustuvor yo‘nalishi
Ma’lumki, korrupsiyaga qarshi kurashish O‘zbekiston Respublikasi Prezidenti tomonidan belgilangan eng ustuvor vazifalardan biridir. Ta’lim tizimi — jamiyat taraqqiyotining poydevori sifatida bu jarayonda alohida e’tibor talab qiladigan yo‘nalish hisoblanadi.
“Korrupsiyasiz soha” loyihasi doirasida amalga oshirilayotgan ishlar
2023 yildan boshlab maktabgacha va maktab ta’limi sohalarida “Korrupsiyasiz soha” loyihasini tatbiq etish bo‘yicha tasdiqlangan “Yo‘l xaritalari” asosida qator tizimli ishlar amalga oshirilmoqda.
Bunda asosiy e’tibor quyidagilarga qaratildi:
boshqaruv jarayonlarining shaffofligini ta’minlash;
byurokratik tartib-taomillarni qisqartirish;
korrupsiya xavf-xatarlarini bartaraf etish;
davlat xizmatlarini to‘liq raqamlashtirish.
Raqamlashtirilgan davlat xizmatlari
“Bir darcha” tamoyili asosida quyidagi xizmatlar to‘liq elektron shaklga o‘tkazildi:
1-sinfga qabul;
shahodatnoma dublikatini berish;
o‘quvchilarni maktablar o‘rtasida ko‘chirish;
chet el fuqarolari farzandlarini qabul qilish;
eksternat imtihonlariga ariza qabul qilish;
xorijiy ta’lim hujjatlarini nostrifikatsiya qilish;
nodavlat ta’lim tashkilotlariga litsenziya berish;
pedagog kadrlarini attestatsiyadan o‘tkazish.
Bugungi kunda elektron xizmatlar soni 10 tadan oshdi, ularning ko‘rsatilish muddati esa qariyb 2 baravar qisqartirildi. Aholidan talab qilinadigan 8 turdagi hujjatlar to‘liq bekor qilindi.
Ta’lim tizimida halollikni targ‘ib etish mexanizmlari
“Korrupsiyasiz soha” loyihasini takomillashtirish maqsadida:
“Halollik vaksinasi” konsepsiyasiga asoslangan o‘quv-metodik dasturlar ishlab chiqildi;
ta’lim muassasalarida GRACE — Korrupsiyaga qarshi ta’lim va yoshlar imkoniyatlarini kengaytirish global dasturi joriy qilindi;
pedagoglar, o‘quvchilar va tarbiyalanuvchilar uchun korrupsiyaga qarshi maxsus o‘quv kurslari tashkil etildi;
“Kelajak soatlari” doirasida dars mashg‘ulotlari muntazam o‘tkazilmoqda.
Shuningdek, “Tarbiya”, “Tarix” hamda “Davlat va huquq asoslari” fanlariga korrupsiyaning mohiyati, halollik va adolat tushunchalariga doir qo‘shimcha mavzular kiritildi.
Korrupsiyaga qarshi oylik
Vazirlikning 2025 yil 28 oktyabrdagi 412-sonli buyrug‘iga muvofiq, 1–25 noyabr kunlari respublika bo‘ylab “Korrupsiyaga qarshi kurash oyligi” o‘tkazilmoqda.
Farg‘ona viloyatida barcha ta’lim bo‘limlari va muassasalari mazkur buyruqda belgilangan vazifalar ijrosini to‘liq ta’minlamoqda.
________________________________________
Hurmatli brifing ishtirokchilari!
Bugun ta’lim tizimida korrupsiya xavfini kamaytirish faqat idoralarning emas, balki ota-onalar, pedagoglar, jamoatchilik va keng hamjamiyatning umumiy mas’uliyatidir. Birgalikdagi sa’y-harakatlarimiz natijasida ta’lim muassasalarini *“Korrupsiyadan holi hudud”*ga aylantirishga albatta erishamiz.
Farg‘ona viloyati Maktabgacha va maktab ta’limi boshqarmasi Axborot xizmati